[老地坊小館]劣食推介

唔記得邊個朋友話食過一個地方嘅雞煲好食，咁啱就見到佢有團購，問大家食唔食, 聽到好食呢個字，梗係即刻舉手叫好啦，而且終於約齊人出發。

因為團購嘅關係，要預先book枱，佢得兩個時間你選擇，六點 or八點九。 大家都要返工返學，而笨妹收工碌到出上環已經六點半，所以順利成章揀八點九。

成班朋友好得閒咁由六點幾開始行街行到八點，唔知係咪年紀開始大，一齊嗌攰話要早啲去等位坐下門口，點知一行到過去，間舖四分一都坐唔滿，唯一嗰張大枱仲要係普通話台。

少人到咁嘅地步，笨妹心入面真係彈咗句「中伏！」

老實講，唔係話咩嘢，如果個地方真係好食，個地方再遠，條龍再長，天氣再熱，香港人一定會陪你去排隊，但係做埋團購都咁少客，明晒！

坐低，揀雞煲辣度，等咗陣就已經有得食，唔係話咩嘢，個雞煲係咪真係好好食？我只可以話個味道係特別，同平時食嘅雞煲味道有啲唔同，但係好唔好食就見仁見智，要講得具體啲，就係重慶雞煲好食過佢。(重慶都好耐無食，唔知有無變差)

平心而論，老地坊執料，真係跟人頭執，幾多人就俾幾多，唔似有啲舖咁，咩都亂執，五個人俾兩粒丸你，唔通要一人咬一啖咁sweet?

另外值得一講嘅，係佢哋擺盤嘅心思。隔離枱叫咗金菇，佢哋會將個金菇擺到成粒海膽咁嘅樣，好盞鬼。另外，佢啲肥牛會卷到成朵花咁， 如果咁樣你點咗丸，佢仲會拎粒丸做花冧。而冬瓜，仲要印成一隻隻蝴蝶咁俾你。

就係因為咁俾心機做擺盤，所以等餸都等得特別耐。不過……我寧願你唔擺囉！

唔知師傅係咪識得少林功夫，暗藏黯然銷魂掌絕技，塊變咗玫瑰嘅肥牛，竟然呈灰灰哋色，
大佬，真係睇見都唔開胃，點解個樣新鮮到出曬位嘅餸，都可以拎出嚟俾人食。

不過，樓面嘅哥哥姐姐服務幾好，但係啲嘢唔得，啲服務好到曉飛都一樣。

價錢：$98(團購)+$16.8(服務費)

地址：上環干諾道中138號地下

營業時間：星期一至六： 0700-0000

　　　　　星期日及公眾假期：休息

回頭率　：★　(五星為最高)

性價比　：★★★

好食指數：★★★

＝＝＝＝＝＝＝＝＝我是分隔線＝＝＝＝＝＝＝＝＝

以下是笨妹的專頁，會與大家分享手繪漫畫的唷～有空進來看看吧！

Facebook 專頁　：https://www.facebook.com/peonyloveeating?ref=hl
instagram　　　：https://instagram.com/peony_love_eating/

為食魚火鍋專門店 For Fish Eating-「烤桂花魚」、「胡椒豬肚雞煲」、「椒鹽九肚魚」及靚仔老闆

前言：

因為實在太好味，成班朋友手快有手慢無，

影咗一張相證明有嚟食，就咩都唔理啦！！！！

正題：

當日，成班來自將軍澳嘅朋友，一齊嚟到港島行山，好健康咁由土地灣行去大浪灣。作為土生土長嘅東區之友，當然要介紹啲好嘢食俾非常少係東區活動嘅朋友。

其實，我想帶佢哋去「雞煲盞」㗎，點知無人聽電話，廢事過到去發現無開鋪就無癮啦。加上當日食完個早餐就開始行，無嘢落肚仲要係大浪灣浪漫食風，出到筲箕灣已經差唔多八點，相信大家都無心情摸門釘。

既然心水餐廳無開，唯有行入「筲箕灣食街」東大街搵嘢食，「為食魚」其實都開咗一段時間，無奈笨母唔太食魚，所以一直都無試，我就膽粗粗話不如食呢間。

------------------------我是分隔線------------------------

就咁睇，舖面其實好細，一眼睇晒，八點先去其實都驚無位。點知入到去，率先令人驚喜嘅係靚仔老闆熱情招呼，佢見我哋成班朋友(望一眼就知會嘈親其他客) ，就好貼心咁俾咗間房我哋坐。

望下個餐牌，價錢可以話偏貴，嗰下都驚帶咗啲朋友去中伏，丸類，餃類，每份得六粒，我哋七個人都唔夠分，個價錢亦顯得有啲貴。但係都要推介個「為食小籠包」，雖然有啲貴，42蚊得6粒，但係食落幾有驚喜，同個真嘅小籠包都有得揮！

我哋點咗「烤桂花魚」、「胡椒豬肚雞煲」，另外再叫啲火鍋配料、小食、串燒咁。

桂花魚好滑，食落好舒服，加上桂花唔多骨，唔使驚哽親。

而個「胡椒豬肚雞煲」，成班熱愛胡椒味嘅人同老闆講唔夠胡椒味，想胡椒味再香啲，老闆二話不說就俾咗碗胡椒我哋無限添加，豬肚唔羶，雞肉夠滑，個湯又香濃，真係好爽吖！啱晒行完龍脊吹完風嘅我哋。

但係最深刻嘅係味「椒鹽九肚魚」，皮薄爽脆香滑多汁，都唔夠形容佢有幾好食！

最令人失望嘅係，食過返尋味想encore個「椒鹽九肚魚」，竟然賣晒呀！嗰種失落真係完全形容唔到。唔係吹水，佢哋個九肚魚，係我廿四歲女以嚟，食過最最最最最最最最最最最最最最最最最最最最最……好食嘅一次，真係好想衝入廚房叫個師傅教我點先可以炸到咁滑咁皮薄咁多汁！！！

聽住成班人失落嘅聲音，個姐姐即刻介紹我哋食「一口豆腐」，果然無介紹錯，但係都無第一啖嘅九肚魚咁驚喜。（利申：笨安妮從來都唔鍾意食豆腐，但係佢整得好好食，都食咗三粒，嘻。)

要留意嘅係，佢只收現金，唔收eps、信用卡，所以去食之前，要㩒定錢呀！不過間舖好近地鐵站同有得攞錢嘅便利店，發現唔夠錢可以即刻去㩒都得。

總算保得住「識食小先鋒」呢個頭銜，老闆加油吖，我會再幫襯㗎！！

回頭率　：★★★★　(五星為最高)

性價比　：★★★☆

好食指數：★★★★☆

地址：筲箕灣筲箕灣東大街109號東成樓地舖

-----------

同場加映，大浪手工啤

呢隻酒係來自夏威夷，並唔係為大浪灣而設㗎！

如果要飲made in Hong Kong 嘅啤酒，等我再行次山搵搵先！

不過坐係大浪灣吹住海風，拎住支大浪啤，又幾好feel㗎。

而淡淡果香味，唔濃，啱晒女仔飲，

相對又無1664嗰啲咁甜，我鍾意(っ´ω`c)

＝＝＝＝＝＝＝＝＝我是分隔線＝＝＝＝＝＝＝＝＝

以下是笨妹的專頁，會與大家分享手繪漫畫的唷～有空進來看看吧！

Facebook 專頁    ：點我前往
instagram              ： 點我前往

Openrice                :   點我前往