安安燒 On On BBQ － 醉翁之意不在串燒

兩年前，安安燒，除了孜然粉，就只有孜然粉。
兩年後，它給了你一個一去再去的理由。

(由於串燒選擇眾多，以下只作抽樣介紹)

～笨安妮不負責推介～

惹味鰻魚汁三重芝士撈丁

本未有打算在串燒店點公仔麵，

卻發現每枱客人均會點一碗，
好奇心驅使下，決定點「惹味鰻魚汁三重芝士撈丁」！

「真係好多芝士㗎！！！！」

起初還擔心，芝士的份量如此多，吃下去會有飽飽滯滯的感覺，

但這些芝士的配搭卻異常合適，令人想一吃再吃。

五個女生分享一個麵，實在是太少了(=￣ω￣=)

惹味蒜蓉生燒茄子

不喜歡茄子的人也可以一試，
笨友吃過後也不斷說要ENCORE

秘製醬燒雞中翼（右）

燒惹味鴨舌（前）、玉子燒（後）

初次嚐到汁燒的鴨舌，新鮮感滿滿。
而玉子燒不像別的食店，淡淡的甜味反而討喜。

安安特色芝士燒蠔

濃濃的芝士味，超讚！

芝士蒜蓉燒生蠔

與安安特色芝士燒蠔相比，比較不推薦，

味道還可以，只是偏淡，亦不太吃到蒜香。

～～～不推薦系列～～～

沙茶醬燒深海大墨魚咀串

怕辣的朋友慎點，而這個墨魚咀應該是口香糖化身。
吞下去的時候，都快要嗆死了～

燒手打魚皮餃

本着嚐鮮的心態點了這個燒手打魚皮餃，
脆的魚皮餃皮感覺總怪怪的，
而味道整體偏鹹，有機會是因為魚皮餃餡料調味已非常充足，
若在燒的過程中再灑上大量調味，便令鹹味過重

蒜蓉燒鮮味海蜆

名字有鮮味，味道卻沒有鮮味，還有沙附送。

～～～總結～～～
其實，串燒店的重點本為串燒，但大家最後也只是難忘芝士撈丁。
相信下一次再到安安燒，必定「醉翁之意不在串燒」啦～

安安燒 On On BBQ

旺角染布房街6號地舖

星期日至四：1800-0300

星期五及六：1800-0400

＝＝＝＝＝＝＝＝＝我是分隔線＝＝＝＝＝＝＝＝＝

關注笨妹的Facebook專頁、Instagram和Openrice的主頁，一起發掘飲食好去處吧！

Grill n More －午市燒烤～試過一次就算嚕

韓風襲港多時，但韓式食店仍長開長有，grill n more, 便是其中一員，

記憶中，grill n more經常有團購活動，未知是其質素有問題，還是鋪位沒其麼人流呢？

那天與他心血來潮想要到茶樓飲茶，但兩個年輕人走進家庭樂天地未免有點異相，加上午市時間等位難，看到grill n more的午餐價錢還可以接受，便試一下。

但進入grill n more前，還是有段小插曲…

笨：不如食呢間啦，上次你又話想試。

他：百幾蚊個，星期日仲要加十蚊喎！

笨：咁總好過我哋晚市試呀！晚市兩個人要成五百蚊先走到。

他：我唔想晏就燒喎…

我：咁星期日飲茶都唔會平好多㗎啦…

笨妹完勝！ya! (一講到食，真係會港女上身)

終於好開心咁跳入去同人講兩位，grill n more標榜無煙燒烤，個場亦都真係無咩煙飄出嚟，感覺上都幾舒服。

埋位！

其實張枱睇落都幾乾淨，算係咁啦，但係一張枱得一個夾好似太少，因為笨妹與他會因為會夾餸爭崩頭，搶住夾，搶住反嘢食，同搶住炒餸。

笨妹覺得，成間舖最好就係醃肉醃得幾好食，唔似出面啲燒烤場，所有肉同一個醃法

選擇都幾多

舊燒賣比想像中好食，仲要一擺出嚟就即刻俾人夾走晒。

蠔仔粥，都算足料。

淡而無味的韓式炒粉絲

握唔實嘅卷物

士多啤梨朱古力火鍋

真心，呢兩件蛋糕好難食。但係有邊個地方任食嘅蛋糕係好食

燒到咁上下，距離限定時間仲有半個鐘左右，已經有位哥仔行埋嚟叫你埋單。由於他散叫咗兩支汽水，所以兩條友盛惠322，晏就嚟講都咪話唔貴。但係佢都算係幾多種類啲熟食選擇，算係咁，不過試過一次，就無下次嚕。

不過，走嘅時候聞下自己個身，無煙味，爽晒！

地址        ：將軍澳唐賢街9號PopCorn 2樓PopFood 4號舖

營業時間：星期一至日: 12:00-23:00

回頭率　：★★☆　(五星為最高)

性價比　：★★★

好食指數：★★★

＝＝＝＝＝＝＝＝＝我是分隔線＝＝＝＝＝＝＝＝＝

以下是笨妹的專頁，會與大家分享手繪漫畫的唷～有空進來看看吧！

Facebook 專頁　：https://www.facebook.com/peonyloveeating?ref=hl
instagram　　　：https://instagram.com/peony_love_eating/

巴希雅海灣重慶燒烤－選擇多，收費亦特別多

香港連續幾日大豪雨，但係同朋友嘅宿營計劃如期進行。（主要係因為排期入營，唔入咪好曬囉⋯⋯）

宿營燒嘢食，好似係香港人必做嘅事，但係落大雨，又點買餸再係露天地方燒嘢食呢？大家又想燒喎，咁唯有行出去幫襯任食場，有個瓦遮頭，又可以食完拍拍蘿柚就走。

一行五人，有個朋友去過「巴希雅海灣重慶燒烤」，而且同營區最近，所以就揀係呢一間到食啦。

其實笨妹比較少係任食燒烤場燒嘢食，記憶中，多數燒烤場都無咩選擇，只係得腸呀、丸吖、扒吖，呢啲食少少已經會好飽嘅嘢，但係呢個場嘅選擇就相對比較多，連羊架（好似係）、牛仔骨呢啲都有。

最神奇嘅係有菜心，當笨妹見識少，我真係唔識燒菜心。但係都有燈籠椒、洋蔥、韭菜、蒜蓉包、鯖魚呢啲，仲有成條茄子任你拎，任食嚟講，真係幾難得。

呢個地方唔係用燒烤叉燒，可以話係懶人串燒，個爐啲碳長期白色，唔知點解都可以燒咁耐都唔使加碳，究竟佢係咩碳嚟？

不過呢個地方，好唔好食真係睇你自己做化，所有嘢無預先醃定，全靠你自己用佢提供嘅調味料。不過你想要蜜糖嘅話，竟然要加錢⋯⋯（真係識做生意）

你哋係張圖到見到，就係每爐一煲嘅蜆，唔知啲蜆係咪佢哋自己出去摸，食嘅時候啲蜆殻仲痴住啲唔同色嘅粗沙，令我對佢個衛生有少少保留。而佢個金菇，係幾香幾好食嘅，夠晒多蒜同牛油，一流。

簡單講下任食區以外嘅嘢先：

枱面上嘅調味：

蒜蓉、七味、辣粉、蒜鹽、水、醬汁、孜然粉

如果你想要蜜糖？盛惠15蚊。自備應該無問題，因為隔離枱好似有自己買超市蜜糖入去

有限食品清單 ：

每枱1煲蜆

1人1隻蝦

6人1包金菇

甜品：

3人1條蕉

1人1舊菠蘿

飲品：

1人1罐汽水（大部分飲品要加錢，笨妹飲津路要加2蚊）

佢哋唔會理你自帶飲品，所以我哋拎咗啲藍妹去飲。

價錢：$149/位 （任燒三小時）

另加$50開爐費

蜜糖再加$15

雖然係咁，不過下一次去大尾督燒嘢食又唔想自己買嘢，都會諗下嚟呢到食，考下自己燒嘢食手勢都好呀嘛！

地址        ：大埔汀角路龍尾村101號

營業時間：星期一至日:14:00-00:00

回頭率　：★★★　(五星為最高)

性價比　：★★★★

好食指數：（睇你自己做化）

＝＝＝＝＝＝＝＝＝我是分隔線＝＝＝＝＝＝＝＝＝

以下是笨妹的專頁，會與大家分享手繪漫畫的唷～有空進來看看吧！

Facebook 專頁    ：點我前往
instagram              ： 點我前往
Openrice                :   點我前往