香港連續幾日大豪雨，但係同朋友嘅宿營計劃如期進行。（主要係因為排期入營，唔入咪好曬囉⋯⋯）
宿營燒嘢食，好似係香港人必做嘅事，但係落大雨，又點買餸再係露天地方燒嘢食呢？大家又想燒喎，咁唯有行出去幫襯任食場，有個瓦遮頭，又可以食完拍拍蘿柚就走。
一行五人，有個朋友去過「巴希雅海灣重慶燒烤」，而且同營區最近，所以就揀係呢一間到食啦。
其實笨妹比較少係任食燒烤場燒嘢食，記憶中，多數燒烤場都無咩選擇，只係得腸呀、丸吖、扒吖，呢啲食少少已經會好飽嘅嘢，但係呢個場嘅選擇就相對比較多，連羊架（好似係）、牛仔骨呢啲都有。
最神奇嘅係有菜心，當笨妹見識少，我真係唔識燒菜心。但係都有燈籠椒、洋蔥、韭菜、蒜蓉包、鯖魚呢啲，仲有成條茄子任你拎，任食嚟講，真係幾難得。
呢個地方唔係用燒烤叉燒，可以話係懶人串燒，個爐啲碳長期白色，唔知點解都可以燒咁耐都唔使加碳，究竟佢係咩碳嚟？
不過呢個地方，好唔好食真係睇你自己做化，所有嘢無預先醃定，全靠你自己用佢提供嘅調味料。不過你想要蜜糖嘅話，竟然要加錢⋯⋯（真係識做生意）
你哋係張圖到見到，就係每爐一煲嘅蜆，唔知啲蜆係咪佢哋自己出去摸，食嘅時候啲蜆殻仲痴住啲唔同色嘅粗沙，令我對佢個衛生有少少保留。而佢個金菇，係幾香幾好食嘅，夠晒多蒜同牛油，一流。
簡單講下任食區以外嘅嘢先：
枱面上嘅調味：
蒜蓉、七味、辣粉、蒜鹽、水、醬汁、孜然粉
如果你想要蜜糖？盛惠15蚊。自備應該無問題，因為隔離枱好似有自己買超市蜜糖入去
有限食品清單 ：
每枱1煲蜆
1人1隻蝦
6人1包金菇
甜品：
3人1條蕉
1人1舊菠蘿
飲品：
1人1罐汽水（大部分飲品要加錢，笨妹飲津路要加2蚊）
佢哋唔會理你自帶飲品，所以我哋拎咗啲藍妹去飲。
價錢：$149/位 （任燒三小時）
另加$50開爐費
蜜糖再加$15
雖然係咁，不過下一次去大尾督燒嘢食又唔想自己買嘢，都會諗下嚟呢到食，考下自己燒嘢食手勢都好呀嘛！
地址 ：大埔汀角路龍尾村101號
營業時間：星期一至日:14:00-00:00
回頭率 ：★★★ (五星為最高)
好食指數：（睇你自己做化）
instagram ： 點我前往
Openrice : 點我前往
沒有留言:
張貼留言