「打開心中的愛便能用盡力量 YEAH!」
大家係2015年7月23日至10月25日,於沙嗲王全線分店,可以同比卡超見面啦!
笨妹同幾位朋友即刻約埋一齊去「品味」童年回憶,正諗住仆去朗豪坊對面間分店嘅時候,先發現已經關門大吉,一行人即刻轉移陣地衝去菜街。
行到去菜街,不出所料,當然係勁多人。終於拎到「B42」飛,望一望個熒幕「B32」。行埋一邊吹水,都唔駛半個鐘就已經有位。(因為太多人中途放棄,我哋不斷大叫,上!上!上!好快就到我哋。)
入到去,第一件事就係發現四圍都係比卡超(心心眼),見到有店員扮比卡超,好想搶咗佢條尾>////////<,埋位,最緊要就當然係個比卡超餐牌。
比卡超飯比想像中少選擇,主食得個咖哩飯(有三個汁揀);辣肉腸PIZZA;甜品;同四款飲品。我哋一致決定,叫齊佢!!!!!
一開始,笨妹一直好擔心比卡超個樣會整容失敗。但係好彩,佢只係瘦身成功,無咗肥啫啫嘅面珠。(可愛度即刻大減。)
由於呢個比卡超係沙嗲王本身最賣得嘅咖哩豬扒飯,當然係唔會伏啦,但係啲豬扒係邊呢?咁就要爆開佢個頭,先會見到啲豬扒㗎。(好殘忍吖!!!!)而我哋係叫草系嘅菠菜咖哩,辣度低,易入口。
不過佢對眼同口係紙嚟,照道理唔食得,佢放係個飯到嘅時候,唔知點解覺得有啲心驚。(令笨妹諗到放個元素周期表入口⋯⋯)
之後就係PIZZA,無咩特別,中間印住比卡超個樣嘅薯片仲好似甩甩哋色。不過呢個PIZZA嘅重點係支旗!令人突然間好似變返小朋友咁,同屋企人去飲茶一定要食啫喱,點解?因為有支旗仔囉!
而個甜品,就真係感覺到中伏,個芒果布甸,口感同味道都好差,而隔離個千層酥係絕對地不鬆化,又係唔知食緊咩嘅力作,圖片真係只供參考。
之後到飲品啦,除咗比卡超有特別之外,其餘三杯都唔覺得有特別。
四杯飲品,比卡超係一致好評;而士多啤梨(紅色,唔記得咩名),有少少似藥水味;奇異果(綠色,都係唔知佢阿水),正常,還可接受;荔枝(藍色,亦都唔知咩名),無試味,但係笨友無出聲,應該都正常。
各位健康主義嘅朋友注意,不設少甜走甜。
當然我哋仲有叫其他嘢食啦,今次個「避風塘軟殼蟹」好多膏,好香,真係好夠運。其他野食都係過去嘅水平,無咩特別。
=========我是分隔線=========
凡係光顧寵物小精靈飲品OR餐點,會隨機送個杯墊OR便利貼。
每一次上菜,店員就會俾個精靈球你,咁你就可以大叫「出嚟啦比卡超!」
我知比卡超唔會入精靈球,但係我好想見到比卡超係入面出嚟,
好可惜,我哋連中三隻奇異種籽,係咪可以進化做奇異果?
另外,大家仲可以買到一啲比卡超精品,啱晒各位比卡超迷XD
地址 :旺角山東街48號1樓
營業時間:星期一至星期日: 11:30-23:30
instagram : 點我前往
Openrice : 點我前往