所謂「新屎坑三日香」，有新舖當然要湊下熱鬧。咁啱見到有人喺將軍澳個FACEBOOK GROUP到講明德有間新嘅餐廳，咁就緊係要去試吓啦！
約咗他係坑口等然後一齊行過去，入到明德商場，離遠都見到有一大班人圍住一間舖嘅門口，目的地即刻非常明顯！埋去問個姐姐拎咗飛等位之後，居然要等成廿幾張枱咁多，究竟間嘢可以有幾好食，令到一間冰室都可以派咁多張飛？
正想離開嘅時候就聽到有人講：「啲優惠券今日用唔到喎，遲吓先食啦！」笨安妮即刻話：「我哋等啦！」唔使半個鐘，就已經有位啦！
間舖都幾細，啲位一眼睇曬！而個招牌都相當有趣，成個舖名都係用麻雀砌出嚟，唔知一共用咗幾多副麻雀呢？老闆係咪好鍾意打牌？
望吓個餐牌，真係嚇到有少少跌咗係到，係一個街坊商場入面竟然會有啲咁貴嘅嘢食，「撈公仔麵餐」跟杯嘢飲要成40幾蚊？我就睇下你有幾好食！咁安妮與他，就各自叫咗一個「瑞士雞翼撈公仔麵」同「滑蛋肉片飯」。（其實其他嘢食價錢都OK，係笨妹死命要叫撈麵。）
瑞士雞翼撈公仔麵$42，額，真係搵條菜望吓都無，張相唔執，只會見到白色碗載位一堆黑色嘢。（執完仲奇怪，因為唔識執。）
呢個麵一共有兩隻雞全翼，成碗麵就大約用咗1個半麵左右。
雞翼雖然話係呢到嘅招牌菜，都好入味，但係實在煮得太耐，雞翼完全無曬咬口，用隻叉一拮落去已經成隻雞翼散開咗。
個麵多就係好多，但係又有幾多人食得曬？情願你俾少半個麵，換做丁麵，感覺上比得個大字好啲。
而且個麵又煮到太淋，根本唔好食⋯⋯$42真係貴到好過份⋯⋯
而他叫嘅「滑蛋肉片飯」，亦都好大碗，他作為一個大男人都食唔晒，如果兩個女仔嚟，一人再叫一杯嘢飲，就完美啦！（安妮無食，唔評嚕，但係望落都幾好咁樣！）所以，如果嚟食碟頭飯就OK，真係嚟淨食個公仔麵就NO啦！（大家都可以考慮下常餐，睇落都幾豐富。）
雖然間舖好忙，但係佢哋都唔會話趕你走，服務都算係咁啦！
地址 ：將軍澳培成里10號明德邨明德商場地下14B號舖
營業時間：星期一至日：18:00 - 02:00
回頭率 ：★★★ (五星為最高)
性價比 ：★／★★★★★（睇你食咩）
好食指數：★★★
＝＝＝＝＝＝＝＝＝我是分隔線＝＝＝＝＝＝＝＝＝
以下是笨妹的專頁，會與大家分享手繪漫畫的唷～有空進來看看吧！
FB//點我前往
ig //點我前往
