夏日炎炎，最想嘅梗係涼浸浸嘅嘢食，而正餐最好就梗係食冷麵啦！
今日咁啱去到樂富，行過夏麵館，望一望個餐牌，有｢三絲拌冷麵($38) ｣，加上笨妹一直好鍾意食上海嘢，仲唔狗衝？
記得之前講過，考試前，除非間嘢太驚為天人，如果唔係笨妹都唔會即刻出文。而夏麵館係邊方面驚為天人，就自己睇啦……
＝＝＝＝＝＝＝＝＝我是分隔線＝＝＝＝＝＝＝＝＝
兩個人叫咗兩份主食，一個小食同一杯飲品，埋單$16x。
男朋友點咗「香辣牛腩麵($58)」，個煲其實幾有誠意，個麵都keep住熱，就算你食晒所有嘢，望住個湯都好似見到對流，仲好似加熱緊咁，所以冬天食嘅話真係一流。
成個麵最諷刺嘅係，佢叫做香辣牛腩麵，但係一啲辣味都無，牛腩亦無炆淋，好韌。(食嗰個講嘅。非笨妹意見。）
而笨妹食嘅「三絲拌冷麵($38)」先係戲肉，咁大個女，從來都唔知道冷麵原來係熱食，我問侍應姐姐：「點解冷麵會係暖嘅？」
佢答：｢因為個麵一早整定嘅，佢要用個湯煮返好，你望下個碗仲有湯係到(指住碗麵) ，所以就係咁，如果你要凍嘅要再整過俾你。｣當然，費事煩，照食。
佢答：｢因為個麵一早整定嘅，佢要用個湯煮返好，你望下個碗仲有湯係到(指住碗麵) ，所以就係咁，如果你要凍嘅要再整過俾你。｣當然，費事煩，照食。
我心諗，你煮完個麵好耐，痴埋咗，你落少少麻油撈散佢都得啦。而家搞到個冷䁔麵不知所謂咁。以拌麵嚟講，今次亦係笨妹咁大個以來，食過最「鞋」口嘅醬，而且個麵一啲彈性都無，真係劣食中嘅劣食。
其實笨妹對「蒜泥白肉($44)」嘅期望，係接近譚仔嗰種，薄薄嘅白肉片加山咁高嘅蒜泥，因為，做到咁細緻，先似係出街洗錢食飯㗎嘛!
不過，部份食店嘅做法都會係厚片加蒜粒，所以都無咩所謂，但係今次蒜嘅份量未免太少，最好笑係，個餐牌，蒜泥白肉隔離明明有隻辣椒，但係又係一啲辣味都無，無辣味，無蒜泥，完全唔知自己原來係叫咗蒜泥白肉。
最後，「夏伯伯酸梅湯($12)」，個味道好奇怪，酸得好過份，甜亦甜得好過份，個感覺就好似唔少心整酸咗，要加大量糖去中和個味道咁樣。
總結，一個字講晒，伏！
＝＝＝＝＝＝＝＝＝我是分隔線＝＝＝＝＝＝＝＝＝
＝＝＝＝＝＝＝＝＝我是分隔線＝＝＝＝＝＝＝＝＝
夏麵館
地址：樂富樂富廣場3樓3125至3126舖
回頭率 ：★ (五星為最高)
好食指數：★★
instagram ： 點我前往
Openrice : 點我前往
沒有留言:
張貼留言