笨妹都一段時間無更新個Blog，因為就快考試，功課又一份接一份。
前兩日係台灣返嚟香港，本來想試吓寫個海外篇推介先，但係返到香港嘅第二個晚餐實在太驚為天人，笨妹決定即刻寫返份（書都唔溫住）⋯⋯
其實Six O One都開咗一段時間，一直都心郁郁想食。
但係有啲嘢，幻想總是美好的，食完之後就發現，真係唔食好過食。
＝＝＝＝＝＝＝＝＝我是分隔線＝＝＝＝＝＝＝＝＝
一行四人，笨妹同笨爸點咗晚早餐，笨媽燒春雞，笨姨就要意大利飯。
另外，仲加咗個芝士焗大啡菇。
好，大家睇咗前菜先：
餐湯，入面嘅係一啲煙肉粒，亦係成餐飯唯一滿意嘅。
黑醋沙律，呢個評唔到，如果黑醋加菜都難食，簡直係MI。
芝士焗大啡菇
個啡菇入面係薯蓉，所以係咪應該講聲會係咁飽肚嘅嘢？味道都算可以，但係我會選擇俾貴幾蚊行去樂軒台食HOW COOL⋯⋯
好，前菜講完，到主菜 ；首先，係笨妹同笨爸食嘅「晚早餐」。
晚早餐PART ONE
薯餅，擺明係無猛火起鑊，成塊油淋淋，跟手仲要放係茄汁豆係隔離，係勁嘅；
煙三文魚，係特惠牌貨色，死鹹；
豬肉腸，肉質太實，皮太韌，又鹹，廚師腸都會好食啲；
大啡菇，焗唔熟，仲生嘅，攪到唔上唔落，食落一啲都唔「豬時」（明明係同芝士啡菇一齊叫，點解一個焗到好多汁，一個焗唔熟？）。
豬腩肉片，煮嘅時候無整散，上碟痴住一舊舊，無醃，簡單嚟講只係得肉味，仲要咁大舊肉，得一忽仔係煎到；蛋，無落鹽炒，亦都唔夠滑，香氣不足。
晚早餐PART TWO
食個餐$128，雖然無加一，但係以質素嚟計，係激貴，成個餐嘅cost真係低無可低，
呢個餐煮嘅技巧已經近乎零，收呢個價錢可唔可以揀啲好啲嘅料，同俾啲心機整？
淨係你個菜絲成支筆咁粗，件薯餅隔嚟擺茄汁豆，就知有幾用心啦！
意大利飯
笨妹只係食咗一啖，雖然笨妹食意大利飯經驗比較少，
但係至少知道意大利飯唔係生粒上碟（你懂得）。
直頭係笨妹細個唔識煲飯煲出嚟嗰碗嘢。
最後仲有笨媽個燒春雞，相無影，見到都唔開胃，
白雪雪嘅雞皮，你真係有焗？
十幾分鐘後，原來隔離枱都有人叫咗燒春雞，佢個雞皮就燶嘅⋯⋯笑而不語。
最後，佢哋就上飲品啦⋯⋯
有色嘅冰水，檸檬都唔記得係咪得一塊⋯⋯
然後笨爸杯啡亦都完全無啡味，飲咗淡就無再飲。
4個人埋單，盛惠＄578。
簡單嚟講，以後都唔會再嚟。
601
地址 ：柴灣祥利街18號祥達中心601號舖
營業時間：星期一至五: 12:00-14:00；18:00-22:00
星期六: 10:00-22:00 星期日: 11:00-22:00
回頭率 ：★ (五星為最高)
好食指數：★
＝＝＝＝＝＝＝＝＝我是分隔線＝＝＝＝＝＝＝＝＝
同場加映，侍應哥哥會表演五爪金龍絕技，唔知咩叫五爪金龍？等笨妹示範⋯⋯
一直以為得大排檔同茶記嘅人會咁做。
instagram ： 點我前往
Openrice : 點我前往
沒有留言:
張貼留言